ភ្នំពេញ៖ អង្គភាពអ្នកនាំពាក្យរាជរដ្ឋាភិបាលមានសេចក្ដីការសោកស្ដាយចំពោះពលរដ្ឋខ្មែរអាមេរិកកាំងមួយចំនួនដែលបានប្រឌិតព័ត៌មាន និងវាយប្រហារដោយគ្មានការទទួលខុសត្រូវមកលើការអនុវត្តរដ្ឋធម្មនុញ្ញជាច្បាប់កំពូលនៃព្រះរាជាណាចក្រកម្ពុជា។ អង្គភាពអ្នកនាំពាក្យចាត់ទុកថា វោហាសាស្ត្រនៃការវាយប្រហារនេះគ្មានតម្លៃជាប្រជាពលរដ្ឋថ្លៃថ្នូរ ជាពិសេសជាអ្នករស់នៅក្នុងអរិយប្រទេសរួចទៅហើយនោះទេ។

ក្នុងសេចក្ដីថ្លែងការណ៍ចុះថ្ងៃច័ន្ទ ទី១៣ ខែមិថុនា អង្គភាពអ្នកនាំពាក្យថានេះគឺជាចេតនាទុច្ចរិតរបស់ពលរដ្ឋខ្មែរមួយចំនួនដែលរស់នៅបរទេសដែលមានចេតនាទុច្ចរិតបង្កាច់បង្ខូច និងឥរិយាបថប្រទូសរ៉ាយជាមួយមាតុប្រទេសរបស់ខ្លួន។

អង្គភាពអ្នកនាំពាក្យរាជរដ្ឋាភិបាល សូមសម្ដែងនូវមោទកភាព ចំពោះការអនុវត្តរដ្ឋធម្មនុញ្ញជាប្រចាំរបស់រាជរដ្ឋាភិបាល ក៏ដូចជាស្ថាប័នកំពូលៗរបស់ជាតិដទៃទៀត ដែលរួមគ្នារក្សាបាននូវសុខសន្ដិភាព ជៀសផុតពីវិបត្តិរដ្ឋធម្មនុញ្ញ ធានាបានស្ថិរភាពនយោបាយ ព្រមជាមួយការអភិវឌ្ឍសេដ្ឋកិច្ច-សង្គមកម្ពុជា ប្រកបដោយភាពស្មើមុខស្មើមាត់ជាមួយបណ្ដាប្រទេសនានាក្នុងសាកលលោក។

រាជរដ្ឋាភិបាលក្រោមការដឹកនាំរបស់សម្ដេចតេជោ ហ៊ុន សែន នាយករដ្ឋមន្រ្ដីនៃកម្ពុជា ព្រមទាំងឥស្សរជនខ្មែរគ្រប់រូបបានធ្វើពលិកម្មគ្រប់បែបយ៉ាងដើម្បីផលប្រយោជន៍ជាតិ និងការរស់រានមានជីវិតរបស់ប្រជាពលរដ្ឋខ្មែរគ្រប់កាលៈទេសៈ និងគ្រប់ស្ថានភាព ស្របតាមខ្លឹមសារដូចដែលបានចែងក្នុងរដ្ឋធម្មនុញ្ញ៕